Эрик Гарсия деярли «Барселона»ни А Серия клубига алмаштирган

«Барселона» ҳимоячиси Эрик Гарсия ўтган йили жамоани тарк этишига бир қадам қолгани ҳақида гапирди. Бу ҳақда euro-football.ru хабар беради.

Испаниялик футболчи 2025 йил январида Италиядаги «Комо» клубига ўтишга жуда яқин бўлган, бироқ келишув якунига етмаган. Шундан сўнг Гарсия «кўк-анорранглилар»нинг асосий таркибидан жой олишга муваффақ бўлди.

«Бир пайт «Комо»га кетаман, деб ўйлагандим. Аммо «Бенфика»га қарши ўйин ҳаммасини ўзгартирди. Флик билан суҳбатдан кейин қолишга қарор қилдим ва ҳозир айта оламанки, бу тўғри танлов бўлган», — дея Гарсиянинг сўзларини испан ОАВ келтирмоқда.

Футболчи учун бурилиш нуқтасига айланган «Бенфика»га қарши баҳс Чемпионлар лигасининг ўтган мавсумидаги умумий босқичида ўтказилиб, каталонияликлар 5:4 ҳисобида ғалаба қозонган. Ўша учрашувда Гарсия ҳам гол урган.