Самир Насри Моуринюнинг Винисиус ҳақидаги гапларига жавоб берди

“Манчестер Сити”нинг собиқ ярим ҳимоячиси Самир Насри “Бенфика” бош мураббийи Жозе Моуринюнинг Мадрид “Реал”и ҳужумчиси Винисиусга қаратилган фикрларини кескин танқид қилди. Бу ҳақда euro-football.ru хабар беради.

Аввалроқ Моуриню “Реал”да қора танли футболчилар кўп бўлса-да, ирқчиликдан доимий равишда айнан Винисиус азият чекаётгани ғалати эканини айтганди. Гап Чемпионлар лигаси плей-офф босқичидаги ўтиш учрашуви атрофидаги вазият ҳақида кетмоқда: Винисиуснинг таъкидлашича, у лиссабонликлар сафидаги Жанлука Престианининг ҳаракатларидан жабрланган.

Насри Canal+ эфирида Моуринюнинг бу позициясини танқид қилиб, мураббийларнинг ўзи ҳам майдонда ҳиссиётга берилиб кетишини эслатди: “Футболчини 90 дақиқа ҳуштакбозлик билан босимда ушлаб туришади, у эса барибир гол уришни хоҳлайди… Буни айтаётган ҳам Моуриню. У ‘Интер’ билан Чемпионлар лигасида ‘Барселона’ни енгиб кейинги босқичга чиққанида, каталонлар стадионида айланиб югурган эди”, — деди франсуз мутахассис.

Шунингдек, Насри португалиялик мураббий “Манчестер Юнайтед”ни бошқарган даврида жамоаси гол урган пайтда Тьерри Анрига хос услубда нишонлаган ҳолатларни ҳам ёдга олди.

Маълумот учун, “Реал” Лиссабонда “Бенфика”ни 1:0 ҳисобида мағлуб этди. Жавоб учрашуви 25 февраль куни Мадридда бўлиб ўтади.