Палладино «Аталанта»нинг Дортмунддаги мағлубиятига изоҳ берди

Италиянинг «Аталанта» жамоаси Дортмунддаги «Идуна Парк»да «Боруссия» қаршисида қийин синовдан ўта олмади ва рақибига жавобсиз икки гол ўтказиб юборди. Учрашувдан сўнг бергамоликлар бош мураббийи Раффаэле Палладино ўйин тафсилотларига тўхталди. Бу ҳақда euro-football.ru хабар беради.

Палладинонинг таъкидлашича, биринчи бўлим охирида ўтказиб юборилган гол эпизодида жамоа аниқроқ ва техник жиҳатдан яхшироқ ҳаракат қилиши мумкин эди. Иккинчи таймда «Аталанта» ўйин ритмини ўзгартиришга уринди, бироқ «Боруссия» яна бир имкониятдан совуққонлик билан фойдаланиб, устунликни мустаҳкамлади.

Шунга қарамай, мураббий жавоб учрашувида вазиятни ўнглаш мумкинлигига ишонч билдирди. Эслатиб ўтамиз, иккинчи ўйин Бергамода бир ҳафтадан кейин бўлиб ўтади.