Кассано «Милан» услуби 80-йиллардек кўринишини айтди

Италия А Серияси собиқ ҳужумчиси Антонио Кассано «Милан»ни кескин танқид қилиши билан танилган. У йилдан йилга «россонери»даги муаммоларни очиқ айтиб келади ва бу сафар ҳам янги бош мураббий Массимилиано Аллегри қураётган ўйиндан ижобий жиҳат топмади. Бу ҳақда euro-football.ru хабар беради.

Кассано фикрича, «Милан» жорий йил ичида атиги учта учрашувда муносиб футбол кўрсатган: «Болонья»га қарши икки баҳс ва «Удинезе» билан ўйин. Унинг таъкидлашича, жамоада ўйин ғояси сезилмаяпти, бошқа клубларда эса аниқ услуб бор, «Милан» эса гўё 80-йиллар футболида қолиб кетгандек ҳаракат қилмоқда.

Айни пайтда «Милан» А Серияси турнир жадвалида иккинчи ўринда бормоқда. Жамоа чоршанба куни «Комо»га қарши майдонга тушади.