Мачей Рибус Россия ва Польша ўйинига ишонмаяпти

Польша терма жамоасининг собиқ футболчиси Мачей Рибус яқин келажакда Россия ва Польша ўртасида ўртоқлик учрашуви ўтказилишига ишонмаётганини айтди. Бу ҳақда euro-football.ru хабар беради.

Аввалроқ Россия март ойида Мали ва Гватемалага қарши ўйнаши мумкинлиги ҳақида хабарлар тарқалган, бироқ ҳозирча Россия футбол иттифоқи бу борада расмий баёнот бермаган.

Рибуснинг таъкидлашича, Россиянинг яқин орада Польшага қарши майдонга тушиш эҳтимоли деярли йўқ. «Ўзингиз кўриб турибсиз, россияликлар кимлар билан ўйнаяпти», — дея унинг сўзларини Metaratings келтиради.

Маълумки, Россия футбол иттифоқи UEFA ва FIFA санкциялари остида қолмоқда. Шу сабаб Россия терма жамоаси аллақачон бир неча йилдан бери расмий мусобақаларда иштирок этмаяпти, чекловлар эса қарийб тўрт йил аввал жорий қилинган.