Гарри Кейн XXI асрда пенальтилар бўйича учинчи бўлди

«Бавария» ҳужумчиси Гарри Кейн фаолиятидаги 100-пенальтисини аниқ ижро этди. Англиялик футболчи Германия Бундеслигасида «Вердер»га қарши ўйинда (3:0) 11 метрлик зарбани голга айлантирди. Бу ҳақда euro-football.ru хабар беради.

Шу баҳснинг ўзида 32 ёшли форвард умумий ҳисобда фаолиятидаги 500-гол маррасига ҳам етиб борди.

FIFA World Cup Stats маълумотига кўра, Кейн XXI асрда пенальтидан 100 та гол урган атиги учинчи футболчига айланди. Бу кўрсаткичда ундан фақат Криштиану Роналду (181) ва Лионель Месси (112) олдинда бормоқда.

Эслатиб ўтамиз, Гарри Кейн 2023 йилда «Тоттенҳэм»дан «Бавария»га ўтган. У профессионал фаолиятининг катта қисмини Лондон клуби сафида ўтказган.