Жорже Жезуш Роналдуни навбатдаги ўйинда асрайди

"Ал-Наср" бош мураббийи Жорже Жезуш Криштиану Роналду нега яқинлашиб келаётган учрашувда майдонга тушмаслигини изоҳлади. Бу ҳақда euro-football.ru хабар беради.

Ар-Риёд клуби чоршанба куни ОФК Чемпионлар лигаси доирасида "Аркадаг"га қарши баҳс олиб боради. Португалиялик юлдуз ҳужумчининг тез орада майдонга қайтиши кутилаётган бўлса-да, бу сафар ҳам у жамоа қайдномасида бўлмайди.

Жезушнинг сўзларига кўра, тиғиз тақвим сабаб Роналдуга ва асосий таркибдаги яна бир қатор футболчиларга дам бериш қарори қабул қилинган. Мураббий олдинда "Ал-Фатех"га қарши муҳим ўйин борлигини таъкидлади.

Шунингдек, Жезуш Роналдунинг Саудия Арабистонидан ташқарида ўтадиган учрашувларни ўтказиб юбориши янгилик эмаслигини, бундай ҳолатлар аввал ҳам кузатилганини эслатди.

Саудия чемпионатидаги "Ал-Фатех" — "Ал-Наср" учрашуви шанба, 14-февраль куни бўлиб ўтади.