Гарри Кейн топ лигаларда 300 гол урган тўққизинчи футболчи бўлди

"Бавария" ҳужумчиси Гарри Кейн Европанинг беш етакчи чемпионатида 300 та гол урган футболчилар сафига қўшилди. Бу ҳақда euro-football.ru хабар беради.

Англиялик форвард бу маррага етган тарихдаги тўққизинчи ўйинчи сифатида қайд этилди. Кейннинг юбилей — 300-голи Бундеслига доирасида шанба кунги "Вердер"га қарши учрашувда (3:0) киритилди.

Ушбу кўрсаткичга Кейндан аввал Лионел Месси, Криштиану Роналду, Роберт Левандовски, Жимми Гривз, Герд Мюллер, Стив Блумер, Дикси Дин ва Златан Ибрагимович ҳам эришган.

Топ-5 Европа лигаларида жами голлар бўйича етакчилик ҳали ҳам Мессига тегишли — 396 гол. Роналду эса ундан атиги битта гол ортда. Иккаласи ҳам фаолиятини давом эттирмоқда, бироқ ҳозир Европадан ташқарида ўйнамоқда.

Кейн "Бавария"га ўтишидан аввал узоқ йиллар "Тоттенҳэм" сафида тўп сурган.