Жезуш Роналдуга дам берди ва у майдонга тушмайди

«Ал-Наср» бош мураббийи Жорже Жезуш Криштиану Роналду нега навбатдаги учрашувни ўтказиб юборишини изоҳлади. Бу ҳақда euro-football.ru хабар беради.

Ар-Риёд клуби чоршанба куни ОФК Чемпионлар лигасида «Аркадаг»га қарши майдонга тушади. Португалиялик юлдуз ҳужумчи яқин орада сафга қайтиши кутилаётган бўлса-да, бу ўйинда ҳам жамоага ёрдам бера олмайди.

Жезушнинг таъкидлашича, тигиз тақвим сабаб Роналду ва асосий таркибдаги яна бир нечта футболчига дам бериш қарори қабул қилинган. Мураббий буни чемпионатдаги муҳим «Ал-Фатеҳ»га қарши баҳс олдидан зарур чорага айланганини айтди.

«Al Nassr Zone» келтирган иқтибосда Жезуш Роналдуга дам бериш янгилик эмаслигини, у Саудия Арабистонидан ташқарида ўтказиладиган учрашувларда аввал ҳам бир неча бор иштирок этмаганини эслатган.

Саудия чемпионатида «Ал-Фатеҳ» — «Ал-Наср» учрашуви шанба, 14 февраль куни бўлиб ўтади.