Джикия клубини ўзгартириши мумкин, агент сабабни айтди

Россиялик ҳимоячи, ҳозирда "Анталяспор" сафида тўп сураётган Георгий Джикиянинг келажаги юзасидан унинг агенти Малик Арутюнов фикр билдирди. Бу ҳақда euro-football.ru хабар беради.

Агентнинг сўзларига кўра, футболчи маош кечикаётгани сабабли Россия Премьер-лигаси клубларидан тушаётган вариантларни кўриб чиқмоқда. Қайд этилишича, тўловлар ноябрь ойидан бери ушланиб қолган, қолган жиҳатларда эса Джикия Туркиядаги шароитдан мамнун.

32 ёшли ҳимоячи "Анталяспор"га ўтган йил ёзида келиб қўшилган ва клуб билан икки йиллик шартнома имзолаган.

Жорий мавсум Туркия Суперлигасида Джикия 12 учрашувда майдонга тушди, 2 та гол урди ҳамда 3 та сариқ карточка олди.