Жезуш Роналдунинг нега ўйнамаслигини изоҳлади ва дам берди

«Ал-Наср» бош мураббийи Жорже Жезуш Криштиану Роналдунинг яқинлашиб келаётган учрашувда майдонга тушмаслиги сабабини очиқлади. Бу ҳақда euro-football.ru хабар беради.

Ар-Риёд клуби чоршанба куни ОФК Чемпионлар лигаси доирасида «Аркадаг»га қарши баҳс олиб боради. Португалиялик юлдуз ҳужумчи тез орада майдонга қайтиши кутилаётган бўлса-да, бу ўйинда у яна таркибда бўлмайди.

«Зич тақвимни инобатга олиб, Роналдуга ҳам, асосий таркибдаги бошқа футболчиларга ҳам дам беришга қарор қилдик. Олдинда «Ал-Фатеҳ»га қарши жуда муҳим ўйин турибди», — дея Жезушнинг сўзларини келтиради Al Nassr Zone.

Мураббий таъкидлашича, Роналдунинг дам олиши янгилик эмас: у Саудия Арабистонидан ташқарида ўтадиган айрим учрашувларда аввал ҳам қатнашмаган.

Саудия чемпионатидаги «Ал-Фатеҳ» — «Ал-Наср» ўйини шанба, 14 февраль куни бўлиб ўтади.