«Барселона» Кристенсен учун янги шартнома тайёрламоқда

«Барселона» спорт директори Деко клуб даниялик ҳимоячи Андреас Кристенсенга янги шартнома таклиф қилмоқчи эканини тасдиқлади. Бу ҳақда euro-football.ru хабар беради.

Деконинг айтишича, каталонияликлар футболчини ноқулай вазиятда қолдиришни истамайди: жароҳат сабаб у мавсум охиригача майдонга қайтиши қийин бўлиши мумкин. Шу боис клуб Кристенсенга адолатли ва мақбул вариантни тақдим этмоқчи, шундан кейин эса футболчи келажаги борасида қарорни ўзи қабул қилади.

«У албатта Барселонада қолиши шарт эмас. Аммо биз ҳеч бўлмаса у кўриб чиқиши мумкин бўлган таклифни берамиз, кейин у ўзи учун энг тўғри йўлни танлайди», — деди Деко матбуот анжуманида.

Кристенсен 2022 йилда «Челси»дан эркин агент сифатида «Барселона»га келиб қўшилганди. Унинг амалдаги шартномаси 2026 йил 30 июнгача мўлжалланган. Жорий мавсумда у 17 ўйинда майдонга тушиб, 1 гол урди. Ҳозирда футболчи боғлам узилиши жароҳатидан тикланмоқда.