Жезуш Роналдуга дам берди ва у майдонга тушмайди

"Ал-Наср" бош мураббийи Жорже Жезуш Криштиану Роналду нега яқинлашиб келаётган учрашувни ўтказиб юборишини изоҳлади. Бу ҳақда euro-football.ru хабар беради.

Ар-Риёд клуби чоршанба куни ОФК Чемпионлар лигаси доирасида "Аркадаг"га қарши майдонга тушади. Португалиялик юлдуз ҳужумчи тез орада майдонга қайтиши кутилган бўлса-да, бу сафар ҳам таркибда бўлмайди.

Жезушнинг айтишича, жамоа зич тақвим сабаб Роналду ва асосий таркибдаги яна бир қатор футболчиларга дам беришга қарор қилган. Мураббий олдинда "Ал-Фатеҳ"га қарши муҳим баҳс борлигини алоҳида таъкидлади.

Шунингдек, у Роналду Саудия Арабистонидан ташқарида ўтадиган ўйинларда вақти-вақти билан қатнашмай қолиши янги ҳолат эмаслигини эслатди. Мураббийнинг сўзларини Al Nassr Zone келтирди.

Саудия чемпионатидаги "Ал-Фатеҳ" – "Ал-Наср" учрашуви 14-февраль, шанба куни бўлиб ўтади.