Роналдуга А Сериядаги кутилмаган трансфер таклиф қилинди

Криштиану Роналду атрофидаги бойкот мавзуси фонида унинг ёзда “Ал-Наср”ни тарк этиши мумкинлиги ҳақида гап-сўзлар яна кучайди. The Sun нашри португалиялик юлдуз фаолиятини давом эттириши мумкин бўлган беш клубни санаб ўтди. Бу ҳақда euro-football.ru хабар беради.

Рўйхатдаги тўрт вариант аввал ҳам оммавий ахборот воситаларида тилга олинган: “Ал-Ҳилол”, “Манчестер Юнайтед”, “Спортинг” ва “Интер Майами”. Бироқ бешинчи йўналиш кутилмаган кўринади.

Манбага кўра, 41 ёшли ҳужумчи “Комо” сафини тўлдириши эҳтимолдан холи эмас. Таъкидланишича, клуб эгалари бўлган индонезиялик миллиардерлар Роналдуга муносиб шартнома таклиф қилиш имкониятига эга.

Роналду аввалроқ А Серияда “Ювентус” шарафини ҳимоя қилган.