Авиатор савдо марказидаги ёнғин бўйича жиноят иши очилди

Тошкент шаҳар Яшнобод туманида жойлашган Авиатор савдо марказида 31 январь куни содир бўлган ёнғин юзасидан жиноят иши қўзғатилди, деб маълум қилди Бош прокуратура матбуот котиби Ҳаёт Шамсутдинов Gazeta.uz’га берган изоҳида.

Жиноят иши Жиноят кодексининг 192¹¹-моддаси (Нодавлат ташкилотидаги мансабдор шахснинг ваколатни суиистеъмол қилиши) ва 259-моддаси (Ёнғин хавфсизлиги қоидаларини бузиш) асосида очилган.

Ёнғин савдо мажмуасининг иккинчи қаватида, Пихел номли болалар ўйин майдончаси ва бир нечта овқатланиш нуқталари жойлашган ҳудудда юз берган. Мажмуанинг биринчи қаватидаги Korzinka супермаркетига зиён етмаган.

Афсуски, ёнғин ўчирилгач, ҳодиса жойидан 2 ёш 7 ойлик боланинг жасади топилган. Тергов давомида аниқланишича, ёнғин содир бўлган пайтда сигнализация тизими ва пуркагичлар ишламаган, эвакуация учун мўлжалланган зинапоя эшиги эса қулфлаб қўйилган бўлган.