Линкольн Моуринёни танқид қилди: у ваъдасида турмади

«Фенербаҳче»нинг собиқ футболчиси Линкольн Жозе Моуринё ҳақида кескин фикр билдирди. Португалиялик мутахассис Истанбул клубини 2024–2025 йилларда бошқарган. Бу ҳақда euro-football.ru хабар беради.

Линкольннинг айтишича, Моуринё унга берган ваъдасини бажармаган ва шахсий муносабатда ҳурматсизлик кўрсатган. «У жуда кўп ютуқларга эришган, буни ҳеч ким инкор этмайди. Аммо мен учун ҳаётда характер совринлардан муҳимроқ. Моуринё мени ҳайратда қолдирди», — деди футболчи.

Унинг таъкидлашича, «Ҳалл Сити»га ижара асосида кетишидан олдин Моуринё у билан гаплашиб, ёзги йиғинга Португалияга чақиришини билдирган. Мавсум якунлангач Линкольн йиғинга таклиф кутган, бироқ мураббий билан боғланишга уринганда Моуринё суҳбатдан бош тортиб, спорт директорга мурожаат қилишни айтган.

«Жамоа Португалияда эди, мен ҳам Португалияда уйимда эдим. Шунга қарамай, Моуринё мени Истанбулга жўнатиб, алоҳида шуғулланишимни буюрди. Бу адолатсизлик ва ҳурматсизлик бўлди. Кўплаб ўйинларда ҳатто ўзимнинг позициямда бўлмасам ҳам клубга ёрдам бериш учун боримни берганман», — дея қўшимча қилди у Fanatik нашрига.

Линкольн оғир жароҳатдан кейин клубдан кўмак кутганини, бироқ бундай қўллаб-қувватловни ҳис қилмаганини ҳам айтди. «Мен бошқалар каби машҳур эмасман, лекин майдонда доим охиригача курашганман», — деди у.

Ҳозирда Жозе Моуринё «Бенфика»ни бошқармоқда.