Жикия агенти ҳимоячининг «Анталяспор»ни тарк этиши ҳақида гапирди
«Анталяспор» футболчиси Георгий Жикиянинг агенти Владимир Кузьмичёв россиялик ҳимоячининг келажаги борасида изоҳ берди. Бу ҳақда euro-football.ru хабар беради.
Агентнинг айтишича, Жикиянинг аҳволи яхши ва клуб мураббийлар штаби унга ишонмоқда. Сўнгги учрашувларда у майдонга тушмагани микрожароҳат билан боғлиқ бўлган, ҳозир эса тикланиб улгурган ва кейинги ўйинда ўйнаши кутилмоқда.
Аввалроқ ОАВда турк клуби «Спартак»нинг собиқ сардори билан хайрлашиши мумкинлиги ҳақида хабарлар тарқалган эди.
Жикия бу мавсум Туркия чемпионатида 12 та учрашувда қатнашиб, 2 бор рақиб дарвозасини ишғол қилган. Унинг «Анталяспор» билан шартномаси 2027 йилнинг ўрталаригача амал қилади.