ОКМК 2026 йил мавсумига тайёргарлик учун Абу-Дабига йиғинга кетди

2026 йилги мавсумга пухта тайёргарлик кўраётган ОКМК футбол клуби дастлабки хорижий ўқув-машғулот йиғинини Бирлашган Араб Амирликларида ташкил этади. Режага кўра, жамоа бугун Абу-Даби шаҳрига йўл олди ва янги мавсум олдидан жисмоний ҳамда тактик жиҳатдан “қовушиб олиш” учун муҳим босқични бошлаб юборди.

Клуб матбуот хизмати маълум қилишича, йиғин жараёнида футболчиларнинг функционал ҳолати текширилади, янги тактик кўринишлар устида ишланади, шунингдек жамоавий ўйиндаги боғлиқликни кучайтиришга алоҳида эътибор қаратилади. Қисқаси, Абу-Даби сафари — ОКМК учун мавсум олдидан “йиғин эмас, двигатель қизиниш” даври.

Мураббийлар штаби — бошқарув тўлиқ таркибда

Йиғинга жамоа бош мураббийи Миржалол Қосимов раҳбарлик қилади. У билан бирга катта мураббий Александр Волков, ёрдамчи мураббий Ҳикмат Эргашев ҳам сафарда.

Физик тайёргарлик бўйича ишлар ҳам жиддий қўлга олинган: фитнесс мураббий Хайрулла Каримов, жисмоний тайёргарлик мураббийи Марат Ахмеров, дарвозабонлар мураббийи Денис Иванков йиғинда қатнашади. Таҳлилчи Акбар Дадашев жамоанинг ўйин жиҳатларини чуқур ўрганиб боради.

Шунингдек, жамоа маъмурлари Руслан Шаймарданов ва Шерзод Юнусов, шифокор Ислам Абаев, массажчилар Абдулла Ризбоев ҳамда Нурбек Жўраев ҳам Абу-Дабига йўл олган. Матбуот хизмати томонидан эса Шерзод Бойиров йиғинни ёритиб боради.

Футболчилар рўйхати: дарвоза, ҳимоя, марказ ва ҳужум

Йиғинга жалб қилинган футболчилар таркиби ҳам эълон қилинди.

Дарвозабонлар:
Жавоҳир Илёсов, Умиджон Эргашев, Ҳамидулло Абдунабиев.

Ҳимоячилар:
Асрор Отахонов, Аброр Каримов, Элдорбек Бегимов, Аҳмадулло Муқимжонов, Саидафзалхон Аҳроров, Саидакбар Шарипов, Шаҳзод Тоиров.

Ярим ҳимоячилар:
Гиорги Папава, Ариҳиро Центоку, Наоаки Сенага, Аброр Саримсоқов, Миржамол Қосимов, Абубакр Ризо Турдиалиев, Беҳруз Асқаров, Акбар Ўктамов, Асад Собиржонов, Ҳазрат Турсунқулов, Риан Исломов, Шерзод Комилов, Комил Тожиддинов.

Ҳужумчилар:
Али Абдураҳмонов, Амир Бакаев.

Терма жамоадаги футболчилар кейин қўшилади

Қайд этилишича, Авазбек Ўлмасалиев, Нодирбек Абдураззоқов ва Азиз Холмуродов миллий терма жамоа йиғинида иштирок этиши сабабли Абу-Дабидаги ўқув-машғулот йиғинини ўтказиб юборади. Улар кейинчалик жамоа ихтиёрига келиб қўшилиши режалаштирилган.

ОКМК учун бу йиғин — янги мавсум олдидан асосий “фундамент”ни қўйиш дегани. Абу-Дабидаги ҳар бир машғулот, ҳар бир тайёргарлик — 2026 йилдаги натижалар учун биринчи инвестиция. Энди мухлисларда битта умид бор: йиғиндан қайтган ОКМК майдонга чиққанда, “тайёргарлик бор экан” деган гап ўз-ўзидан эшитилиб қолсин.