Арбелоанинг «Реал»да қолишига фақат битта шарт борлиги маълум бўлди

Мадриднинг «Реал» клубида бош мураббий Алваро Арбелоанинг келажаги аллақачон аниқ бир мезонга боғлаб қўйилгани айтилмоқда. Cadena Ser нашри тарқатган маълумотларга кўра, испаниялик мутахассис 2025/2026 йилги мавсум якунида фақат битта ҳолатда — катта соврин қўлга киритилса — «қироллик клуби»да бош мураббий сифатида ишини давом эттириши мумкин.

Манба қайд этишича, Арбелоа «Реал»ни ёки Чемпионлар лигасида, ёхуд Испания чемпионатида ғолиб қилган тақдирдагина лавозимда сақланиб қолади. Агар ушбу икки йўналишдан бири амалга ошмаса, клуб раҳбарияти ёз фаслида янги мураббий қидириш жараёнини бошлаб юбориши эҳтимол.

Аслида Арбелоа учун старт ҳам осон кечмади. Аввалроқ «Реал» Испания Кубогида кутилмаган натижа қайд этиб, иккинчи лига вакили «Албасете»га 2:3 ҳисобида мағлуб бўлди ва мусобақа билан эрта хайрлашди. Энг муҳими, мазкур учрашув Арбелоанинг «Реал» бош мураббийи сифатидаги илк расмий ўйини бўлгани учун, бу мағлубият жамоадаги босимни янада кучайтириб юборди.

Ундан олдин ҳам мадридликлар яна бир оғир зарба қабул қилган: 11 январ куни Испания Суперкубоги финалида «Барселона»га 2:3 ҳисобида мағлуб бўлган «Реал» совриндан қуруқ қолди. Орадан бир кун ўтиб эса жамоани бошқариб келган Хаби Алонсо клубни тарк этди. Натижада унинг ўрнини аввал «Реал» ёшлар жамоасида ишлаган Алваро Арбелоа эгаллади.

Энди эса вазият оддий: Арбелоа учун ҳар бир ўйин — имтиҳон. «Реал»да вақт тез ўтади, сабр эса одатда жуда қисқа бўлади. Шунинг учун испаниялик мутахассисга ёки Ла Лига, ёки Чемпионлар лигасидаги катта финал табассуми керак. Бошқа сценарийда эса Мадрид яна “янги қутқарувчи” излаш режимини ёқиши мумкин.