Мбаппе: “Роналду менинг ҳаётимдаги илҳом манбаим”

Франция терма жамоаси ва “Реал Мадрид” ҳужумчиси Килиан Мбаппе Саудия Арабистонининг “Ан-Наср” клуби сафида тўп суриб келаётган Криштиану Роналду ҳақида самимий фикрларини билдирди.

Мбаппега кўра, Роналду нафақат футбол оламидаги афсона, балки унинг шахсий ҳаётида ҳам катта аҳамиятга эга шахсдир.

“Криштиану мен учун доимо идеал намуна бўлган. Унинг меҳнатсеварлиги, ўз устида ишлаши ва майдондаги иродаси — барчаси менга илҳом беради. Роналду ‘Реал’ клубининг рамзи, эталони ҳисобланади. Одамлар ҳали ҳам уни эслаб, у ҳақда ҳурмат билан сўз юритишади”, — деди Мбаппе Movistar телеканалига берган интервьюсида.

Ёш юлдузнинг таъкидлашича, Роналду унга шахсан маслаҳатлар бериб, касбий йўлида ёрдам бермоқда.

“У менга кўп бора маслаҳат берган. Футболда ва умуман ҳаётда тўғри қарор қабул қилиш бўйича ҳам Роналдунинг тажрибаси мен учун жуда муҳим. Унинг ҳар бир гапи менга куч бағишлайди”, — деди Мбаппе.

Ҳозирда икки футболчи турли чемпионатларда ўйнаётган бўлса-да, уларни ўзаро ҳурмат ва футболга бўлган умумий муҳаббат бирлаштириб туради.