Эрлинг Ҳоланд Исроилга қарши хет-трик қайд этиб рекордини янгилади

Жаҳон чемпионати саралаш босқичи доирасида бўлиб ўтган Норвегия — Исроил учрашувида майдон соҳиблари ҳақиқий гол ёмғирини уюштирди. “Улрвал” стадионида ўтган беллашув 5:0 ҳисобида норвегияликларнинг йирик ғалабаси билан якунланди.

Белгиланган учрашувда “Манчестер Сити” ҳужумчиси Эрлинг Ҳоланд яна ўзининг жаҳон даражасидаги гол машинаси эканини намойиш қилди. 25 ёшли форвард уч марта рақиб дарвозасини ишғол этиб, хет-трик қайд этди. Унинг голлари 27-, 63- ва 72-дақиқаларда киритилди.

Шунингдек, у икки бор пеналтидан унумли фойдалана олмади. Норвегиялик ҳужумчининг дастлабки зарбасини посбон бартараф этди, ҳакам эса пеналтининг қайта ижро этилишини айтди. Бироқ иккинчи уринишда ҳам Ҳоланд гол ура олмади.

Қолган икки тўп эса Исроил футболчилари томонидан автогол сифатида қайд этилди. Шу тариқа Норвегия муҳим 3 очкони қўлга киритди.

ЖЧ-2026 саралаши. Европа. 11 октябр
I гуруҳи. 7-тур
Норвегия — Исроил 5:0
Голлар: Ҳалайли 18 (авт), Ҳоланд 27, 63, 72 (хет-трик), Наҳмияс 28 (авт).

Норвегия — Нюланд — Рюэрсон, Айер, Хеггем, Вольфе (Бьоркан 76) — Бобб (Деннум 76), Берг (Осгор 76), Берге, Нуса — Серлот (Ларсен 76), Холанд (Шельдеруп 85).

Исроил — Д. Перец — Даса (Мизрахи 71), Блорян, Наҳмияс (Балтакса 32), Ревиво — Э. Перец, Глух (Тургеман 87) — Битон (Барибо 71), Абу-Фани (Ной 46), Соломон — Ҳалайли.

Огоҳлантириш: Тургеман 89.

Фойдаланилмаган пеналтилар: Ҳоланд 5, 6 (иккисини ҳам дарвозабон қайтарди).

Қайд этиш лозим, мазкур натижадан сўнг норвегияликлар турнир жадвалида 18 очко билан пешқадамлигини мустаҳкамлаб олди. Жамоа ҳали бирорта ўйинда очко йўқотгани йўқ.

Бу ўйин Эрлинг Ҳоланд учун ҳам тарихий аҳамият касб этди — у терма жамоа сафидаги голлар сонини 51 тага етказди. Мавсум бошидан бери “Манчестер Сити” ва Норвегия учун 20 тадан ортиқ гол урган Ҳоланд ҳозирча Европада энг юқори формадаги ҳужумчилардан бири ҳисобланмоқда.

Таҳлилчилар фикрича, Ҳоланднинг терма жамоадаги гол серияси уни нафақат Норвегиянинг, балки бутун Европанинг рекордлар китобига яқинлаштирмоқда. Унинг ёши 25 бўлса-да, аллақачон жаҳон миқёсидаги энг самарали ҳужумчилар қаторига киради.

Норвегия термаси учун эса бу ғалаба муҳим руҳий бурилиш бўлди — жамоа кейинги турда ҳам шундай таъсирли ўйин намойиш этишни мақсад қилган.