Перуда президентга қарши импичмент: жиноятчилик сабаб бўлди

Перу парламенти мамлакатда кучайиб бораётган жиноятчилик ва сиёсий беқарорлик фонида президент Дина Болуартега нисбатан импичмент эълон қилди, деб хабар берди Diario Gestion.

Маълумотларга кўра, конгресснинг 122 нафар аъзоси президентни лавозимидан озод этиш учун якдил овоз берган. Ҳеч ким қаршилик кўрсатмаган ва бетараф қолмаган.

Парламент аъзолари Болуартенинг “ахлоқий лаёқатсизлиги”ни асос қилиб кўрсатишди. Улар фикрича, давлат раҳбари мамлакатдаги сиёсий ва ижтимоий инқирозни бартараф этишга қобилиятсиз бўлган, коррупцион ишларда иштирок этган ва жамоатчилик ишончини йўқотган.

Ҳужжатда таъкидланишича, мамлакатда уюшган жиноятчилик даражаси ҳаддан ташқари юқори, фуқаролар хавфсизлиги эса “мисли кўрилмаган даражада” паст. Шунингдек, қотилликлар сони ортиб боргани ҳам импичмент қарорини қўллаб-қувватловчи асос сифатида тилга олинган.

Перу бош вазири Эдуардо Арана ҳукумат конгресс томонидан қабул қилинган қарорни тан олишини маълум қилди.

Дина Болуарте мажлисда иштирок этмаган. У 2022 йил декабридан бери Перу президенти лавозимини эгаллаб келаётганди.

Импичмент қароридан сўнг парламент спикери Хосе Хери мамлакатнинг янги президенти этиб тайинланди. У ҳамон ёш сиёсатчи ҳисобланади — 38 ёшда ва июль ойидан буён конгрессга раҳбарлик қилиб келган.

Сентябрь ойи охирида Перуда оммавий норозилик намойишлари кузатилганди. Фуқаролар нафақат ҳукуматнинг жиноятчиликка қарши чорасизлигидан, балки пенсия ислоҳоти ва коррупцияга қарши курашнинг самарасизлигидан ҳам норози бўлишган.

Шу тариқа, Перуда сиёсий беқарорлик яна авж олди — янги президентни олдида эса хавфсизлик ва ишончни тиклашдек оғир вазифа турибди.