2025 йилги тиббиёт Нобели АҚШ ва Япония олимларига насиб қилди

2025 йил тиббиёт соҳасидаги Нобел мукофоти совриндорлари эълон қилинди, деб Nobelprize.org сайти хабар берди. Бу йилги мукофот периферик иммун толерантлик бўйича кашфиётлари учун АҚШлик Мэри Брунков ва Фред Рамсделл ҳамда Япониялик Шимон Сакакучига топширилди.

Олимларнинг ишлари инсон иммун тизими “ўзиники”ни “бегона”дан қандай фарқлашини англашга ёрдам берди. Бу аутоиммун касалликларнинг ривожланишига қарши самарали чоралар кўришга йўл очди.

Кашфиётлар иммун тизимининг бузилиши билан боғлиқ касалликларни даволашда янги имкониятлар яратиб, тиббиёт соҳасида муҳим илмий асос бўлиб хизмат қилмоқда.