Янги Samsung қулоқчинлари сиз қачон зерикишингизни ҳам аниқлай олади

Samsung компанияси яқинда янги технологик инновацияни намойиш этди — “фикрларни ўқувчи” қулоқчинлар. Ушбу қурилма фойдаланувчининг мия фаолиятини таҳлил қила олади ва 92,86% аниқлик билан сизга қайси видеолар, мусиқа ва ҳатто таомлар ёқишини билади. Бу технология кундалик ҳаётда инсон хоҳишларини олдиндан сезиш имкониятини яратади.

Қулоқчин фойдаланувчининг қулоқ атрофидаги сенсорлар орқали мия фаолиятини ўқийди. Шу тарзда, фойдаланувчи қачон зерикиши ёки уйқуси келишини аниқлаш мумкин. Бу эса, қурилмани янада шахсийлаштирилган хизматлар ва тавсиялар учун ишлатишга имкон беради.

Ҳозирда Samsung прототипни синовдан ўтказмоқда. Мутахассислар ушбу технологиянинг келажакда кўплаб соҳаларда, жумладан, медиа, ўйин, мусиқа ва овқатланиш тавсиялари беришда инқилобий ўзгаришлар келтиришини тахмин қилмоқда. Шу билан бирга, шахсий маълумотлар ва махфийлик масалалари ҳам жиддий муҳокама қилинмоқда, чунки мия фаолиятини кузатиш технологияси катта эҳтиёткорликни талаб қилади.