Ҳафта давомида ҳаво кескин совийди, ёмғир ва шамол кутилмоқда

Ўзгидромет маълумотларига кўра, сентябрнинг охирги кунлари мамлакатимизда асосан қуруқ ва илиқ об-ҳаво ҳукм суради. Ҳарорат кундузлари +26…+29 даража атрофида, айрим ҳудудларда +31 даражагача кўтарилади.

Бироқ 1–2 октябрдан бошлаб вазият кескин ўзгаради: Қозоғистондан кириб келадиган салқин ва нам ҳаво республика бўйлаб ёмғирлар келишига сабаб бўлади.

1 октябрь — Қорақалпоғистон, Навоий ва Тошкент вилояти шимолида айрим жойларда ёмғир ёғади.

2 октябрь — Фарғона водийси вилоятлари, Тошкент, Самарқанд, Жиззах ва Сирдарёда кечаси ва эрталаб ёмғир кутилмоқда.

3 октябрь — фақат Фарғона водийсида қисман ёғингарчилик сақланиб туради.

Ҳарорат 1–2 октябр кунлари кескин пасаяди: кечаси ва эрталаб +8…+13 даража, кундузи эса +18…+23 даражадан ошмайди. Республика шимолида бу кўрсаткич янада паст бўлиб, кечалари +4…+9, кундузлари эса +15…+18 даражани ташкил этади.

3 октябрдан эътиборан кундузги ҳарорат 2–3 даражага кўтарилиши кутилмоқда. Жанубий ҳудудларда 1 октябргача илиқ ҳаво сақланади, аммо 2–3 октябрдан бу ерларда ҳам +20…+25 даражагача пасайиш эҳтимоли бор.

Шамол тезлиги айрим жойларда 13–18 м/с гача кучайиши, баъзи ҳудудларда чанг-тўзон ҳам кузатилиши мумкин.

Тошкент шаҳрида:

28–30 сентябрда — ёғингарчилик бўлмайди.

1 октябрда кечаси ва эрталаб, шунингдек 2 октябрда вақти-вақти билан ёмғир ёғиши мумкин.

3 октябрда — қайтадан қуруқ об-ҳаво кутилмоқда.

Шарқий шамол йўналишини ғарбга ўзгартириб, 3–8 м/с тезликда эсиши, баъзи вақтларда 10–12 м/с гача кучайиши мумкин.

Ҳарорат Тошкентда:

29–30 сентябрда кечаси +15…+17, кундузи +26…+29 даража.

1–2 октябрда кечаси +8…+11, кундузи +18…+21 даража.

3 октябрда кечаси +8…+11, кундузи +22…+24 даража бўлади.