Қозоғистондаги нефт базада портлаш содир бўлди

Қозоғистоннинг Жезқозғон шаҳрида жойлашган нефт базасида содир бўлган портлаш оқибатида олти киши жароҳат олди, деб хабар беради Тengrinews.

Қайд этилишича, Жезқозғон шаҳри ҳудудида жойлашган нефт базаларининг бирида учта махсус транспорт воситасида ёнғин чиққан. Ўт ўчирувчилар воқеа жойига етиб келгунга қадар портлаш юз берган ва бино қулаб тушган.

^{Фото: Видеодан кадр}

«2025 йил 25 январ куни Жезқозғон шаҳридаги нефт базаларининг бирида содир бўлган ёнғин оқибатида олти киши жароҳат олди. Уларнинг беш нафари вилоят кўп тармоқли шифохонасига жойлаштирилган, бир нафари шифохонага боришдан бош тортган. 1961 ва 1971 йилда туғилган икки эркак жонлантириш бўлимида қолмоқда», — дейилади хабарда.

Ёнғин юқори даражадаги мураккабликка эга офат дея таснифланган. Улуғтоғ вилояти ҳокимининг буйруғи билан тезкор штаб ташкил этилган. Ҳодиса жойига 10 та техника, 20 дан ортиқ ходим жалб этилган.

Таъкидланишича, ҳодиса жойидаги тезкор штаб қўшни резервуарларни ёнилғини совитиш орқали ҳимоя қилиш бўйича стратегик қарор қабул қилган.