Абдуқодир Ҳусанов трансфери Осиёнинг деярли барча терма жамоаларидан қиммат туради

Ўзбекистон миллий терма жамоаси марказий ҳимоячиси Абдуқодир Ҳусанов трансфери учун “Манчестер Сити” мутасаддилари “Ланс”га 40 миллион евро миқдорида бадал пули тўлайди.

Қўшимчасига ўзаро музокараларда Франция клуби 10 миллион евро миқдорида бонусларга ҳам эга бўлиши келишилган.

Статистика экспертлари қизиқ ҳолатга эътибор қаратишди. Англия чемпионларининг ўзбек футболчиси учун тўлайдиган бадал пули Осиёнинг деярли барча мамлакатлари терма жамоаларининг умумий қийматидан қиммат бўлиб чиқмоқда.

Осиё футбол конфедерацияси аъзолари орасида таркибининг умумий нархи 40 миллион евродан юқори бўлган фақатгина тўртта терма жамоа бор. Transfermarkt порталида қайд этилишича, қитъамизнинг энг қимматбаҳо терма жамоаси Япониядир. Кунчиқар юрт шарафини ҳимоя қилаётган чарм тўп усталаридан иборат жамоанинг умумий қиймати 280,5 миллион еврони ташкил қилади.

Иккинчи ўринда қайд этилган Жанубий Корея терма жамоаси 158,15 миллион еврога баҳоланган. 2024 йил якунига кўра, Ўзбекистон миллий терма жамоасининг бир неча футболчилари трансфер нархида ижобий ўзгаришлар бўлди. Бу рейтингда кучли учликка кирган бош жамоамиз таркиби айни пайтда 47 миллион еврога баҳоланмоқда.

Биздан кейинги – тўртинчи қатордан ўрин олган Эрон миллий терма жамоаси аъзолари 46,65 миллион евро туради.

Осиё футбол конфедерациясига аъзо яна 43 та мамлакат терма жамоалари таркибининг умумий қиймати “Манчестер Сити”нинг Абдуқодир Ҳусанов учун тўлайдиган бадал пулига тенглаша олмайди.

Улардан жаҳон чемпионатларида иштирок этиш бахтига мушарраф бўлган энг машҳур терма жамоалар таркиби қуйидагича баҳоланган:

- Австралия терма жамоаси – 39 миллион евро;
- Бирлашган Араб Амирликлари – 35 миллион евро;
- Қатар – 18,98 миллион евро;
- Саудия Арабистони – 18,85 миллион евро;
- Хитой – 13,5 миллион евро;
- Корея Халқ Демократик Республикаси – 5,8 миллион евро.

Таъкидлаш жоизки, жаҳон футболи тарихида бадавлат клублар шу пайтга қадар Осиё мамлакатларидан фақат Япония ва Жанубий Корея футболчилари учун катта сумма тўлаган.

Бу борада “Рома” 2021 йили Элдор Шомуродов учун 19,6 миллион евро харажат қилгани қайд этилган. Энди Абдуқодир Ҳусановнинг 40 миллион евролик трансфери Ўзбекистон ва Марказий Осиё футболчилари учун янги рекорд сифатида қайд этилади.