Татарстанда «Бердәм Россия» алдан тавыш бирүгә старт бирде

Бүген алдан тавыш бирүдә катнашу өчен кандидатларны теркәү башланды, аның нәтиҗәләре буенча Дәүләт Думасына сайлауларда партиядән тәкъдим ителүгә дәгъва итүчеләр билгеләнәчәк. Бу хакта «Бердәм Россия» рәсми порталы хәбәр итә.

Беренче булып документларын ТР Дәүләт Советы депутаты, «Яшь Гвардия»нең төбәк штабы җитәкчесе Руслан Шиһабетдинов һәм Казан дары заводы слесарь-ремонтчысы Айнур Салаватов тапшырган.

Шиһабетдинов белдергәнчә, яшьләр актуаль мәсьәләләр буенча үз позицияләрен якларга тиеш. Ул агитацияне партиянең халык программасы нигезендә төзергә ниятли һәм яшьләрнең аны формалаштыруда катнашуының мөһимлеген ассызыклый.

Партиянең төбәк башкарма комитеты җитәкчесе Марат Сәмигуллин искә төшергәнчә, алдан тавыш бирү процедурасы «Бердәм Россия» тарафыннан инде 15 елдан артык үткәрелә һәм ул уникаль корал булып кала. Анда 21 яшьтән өлкәнрәк, пассив сайлау хокукына ия РФ гражданнары катнашырга хокуклы.

Сәмигуллин махсус хәрби операция ветераннарының праймеризда актив катнашуына өмет белдерде. Алар өчен преференцияләр каралган: алар өчен видеороликлар яздыру мәҗбүри түгел, ә тавыш бирү йомгаклары буенча җыелган тавышларга өстәмә 25 процент өстәләчәк.

Документлар 30 апрельгә кадәр түбәндәге адрес буенча кабул ителә: Казан, Горький ур., 9, 3 нче кат. Эш режимы: эш көннәрендә 9:00 дән 18:00 гә кадәр, шимбә көннәрендә 10:00 дән 12:00 гә кадәр. «Дәүләт хезмәтләре» порталында сайлаучыларны теркәү 20 апрельдән 29 майга кадәр узачак, электрон тавыш бирү үзе – 25 майдан 31 майга кадәр. Оештыру комитетының барлык карарлары партиянең төбәк бүлеге сайтында бастырыла.