Дәүләт Думасында пенсия алды яшендәгеләр өчен ташламалар турында искәрттеләр

Пенсия алды яшендәге гражданнар өчен ташламалар күләме һәм исемлеге төбәк хакимиятләре тарафыннан билгеләнә, ул бюджет мөмкинлекләренә һәм җирле традицияләргә бәйле. Депутат, Дәүләт Думасының хезмәт комитеты әгъзасы Светлана Бессараб «Татар-информ» агентлыгы белән әңгәмәсендә шул хакта искәртте.

«Бу ташламалар төбәк закон чыгару органнары яки төбәк башкарма хакимият органнары тарафыннан билгеләнә. Чөнки күпчелек төбәкләр өстәмә социаль гарантияләр тәкъдим итә», - дип аңлатты ул.

Эксперт сүзләренчә, пенсия алды яшендәге гражданнар торак-коммуналь хезмәтләр өчен түләү, шулай ук салым салу буенча билгеле бер ташламаларга (мәсәлән, җир кишәрлегенә яки торак бинага милек салымына) хокуклы.

Ташламаларның конкрет җыелмасы төбәккә карап аерыла. Кайдадыр бу - торак-коммуналь хезмәтләргә түләү буенча ташламалар, кайдадыр - шәһәр яны тимер юл транспортында йөрү өчен субсидияләр (гадәттә, алар түләүдән тулысынча азат итми, ә компенсация рәвешендә була). Аерым төбәкләрдә шәхси йортларны җылытуга өстәмә компенсацияләр каралган.

«Төбәкләрдә социаль гарантияләр төрле, алар бюджет параметрларына һәм мәдәният традицияләренә карый», - дип искәртте ул.

Бессараб билгеләп үткәнчә, федераль дәрәҗәдән 55 яшьтән узган хатын-кызлар һәм 60 яше тулган ир-атларның, әгәр алар Дәүләтнеке булмаган пенсия фондының тиешле программаларында катнашса, дәүләтнеке булмаган пенсия түләүләрен алу хокукы бар.