Татарстанның балалар лагерьларында әдәби сәгать барлыкка киләчәк

Татарстанның балалар лагерьларында җәйге сәламәтләндерү сезоны башлану белән әдәби сәгать барлыкка киләчәк. ТР яшьләр эшләре министры Азат Кадыйров «Татар-информ» агентлыгына шулай дип белдерде.

«Радиорубка аша татар һәм рус шагыйрьләренең шигырьләре, язучыларның әсәрләреннән өзекләр, патриотик җырлар яңгыраячак», - дип аңлатты ул.

Аның сүзләренчә, балаларны савыктыру лагерьларында сменаларның профильле программаларына карата таләпләр катгыйландырыла. Конкрет нәтиҗәгә басым ясалачак: балалар ниндидер яңа һәм файдалы әйберләр өйрәнергә яки белергә тиеш.