Тукай районында чыккан янгында 26 яшьлек ир-атны коткарганнар

Тукай районының Кече Шилнә авылында бер катлы агач бинада янгын чыккан. Мебель һәм түшәмнең бер өлешенә ут капкан, янгынның мәйданы 6 квадрат метр тәшкил иткән. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсендә хәбәр иттеләр.

Урынга килгән янгын сүндерүчеләр, махсус битлек кулланып, төтен белән тулган бинадан 26 яшьлек ир‑атны урамга алып чыккан. Зыян күрүчене хастаханәгә озатканнар.

Янгын саксыз тәмәке тарту сәбәпле чыккан дип фаразлана.