Европада яшәүче татарлар Берлин профессиональ театр сәхнәсендә татарча спектакль куячак

Европада яшәүче татарлар арасыннан тупланган төркем Берлин профессиональ театр сәхнәсендә татарча спектакль куячак. «Die Quelle | Чыганак» спектакленең премьерасы 13, 14 март көннәренә билгеләнгән. Спектакльнең режиссёры – Айдар Җәббаров. Бу хакта эмиграциядәге татарлар турында язучы «Дулкын» медиасы хәбәр итте.

Спектакль нигезендә – Гаяз Исхакыйның дүрт хикәясе. Автор үзе дә Берлинда яшәгән, монда татарларны берләштергән, журнал чыгарган.

«Үз тамырын, үз чыганагын белгән халык корымас. Чыганак – ул урын түгел, ә күңел хәләте. Аны юкка чыгарып булмый – онытып кына була. Гаяз Исхакыйның иҗаты һәм аның дәвамы буларак әлеге спектакль – буыннар арасындагы чылбыр», – ди спектакльнең режиссёры Айдар Җәббаров.

«Бу – очраклы гына килеп чыккан хәл кебек булды. Әлбәттә, спектакль кую турында уебыз күптән бар иде. Беренчедән, үзебезгә кызыклы, икенчедән, театр сәнгате төрле катлам кешеләрен берләштерә, өченчедән, без болай да һәр очрашуда, балалар чараларында театр оештырабыз. Хәзер исә югарырак үрләрне яулыйбыз!», – дип сөйли спектакль кую идеясе туу турында «Чыганак» спектакле продюсеры Ләйсән Гәрәева.

«2025 елның язында «Казаннан бер режиссёр, Алманиядә җирле татарлар белән спектакль куярга тели» дигән хәбәр килеп иреште. Бу яңалык тиз арада тиешле адресатын тапты дияргә буладыр, чөнки без, озак уйламый, эшкә керештек. Айдар белән элемтәгә кердек, сәхнә таптык, кастинг үткәрдек, афишалар ясадык», – ди спектакльнең продюсеры Эльза Нәбиуллина.

Җәй уртасында кастинг игълан ителгән. Максат: читтә яшәүче татарлар арасыннан татарча камил сөйләшүче кешеләр табу. Нәтиҗәдә ун кешелек труппа тупланган. Укытучы, журналист, музыкант, кинорежиссёр, завод эшчесе –барысы да атнага бер тапкыр театр артистларына әйләнгән. Әзерлек ноябрьдә башланган. Видео аша шалтыратышып, Айдар Җәббаров яңа шәкертләренә дәресләр биргән. Булачак артистлар заманча театрның үзенчәлекләре белән танышкан. Февральдә репетицияләр залда үткәрелә башлаган.

Тамашачылар арасында татарлар гына түгел, ә безнең мәдәният белән кызыксынучы һәркем булачак. Шуңа күрә спектакль татар телендә, алманчага тәрҗемә белән барачак. Труппа киләчәктә дә яшәр һәм башка шәһәрләрдә дә чыгыш ясар, дип өметләнә милләттәшләр.