Рөстәм Миңнеханов КАМАЗны 50 еллык юбилее белән котлады

Татарстан Рәисе Рөстәм Миңнеханов Чаллы шәһәр советының хисап сессиясендә «КАМАЗ» ГАҖ коллективын һәм автошәһәр халкын беренче йөк автомобилен чыгаруга 50 ел тулу белән котлады.

«Шәһәр советының хисап утырышы истәлекле датада үткәрелү символик мәгънәгә ия. Нәкъ 50 ел элек бу көнне төп җыю конвейерыннан беренче КАМАЗ йөк машинасы чыкты», – дип билгеләде Миңнеханов.

Ул компаниянең сәнәгатьне һәм илнең технологик лидерлыгын үстерүдәге ролен ассызыклады. «Бүген КАМАЗ – Россия Федерациясенең иң зур автомобиль корпорацияләренең берсе, авыр йөк машиналары җитештерүче компанияләр егермелегенә керә, Россия йөк автомобильләре, автобуслар чыгару, электр һәм пилотсыз автомобильләрне үстерү буенча лидер булып тора, илнең оборона сәләтен ныгытуга зур өлеш кертә. Аерым горурлык – КАМАЗ-мастер командасы».

ТР Рәисе шулай ук предприятиенең шәһәр өчен тарихи әһәмиятен дә билгеләп үтте. «КАМАЗны төзү турындагы карар Чаллы өчен хәлиткеч вакыйга булды. Бу вакыйга кечкенә шәһәрчекне зур индустриаль үзәккә әйләндерде. Шәһәр белән автогигантның тарихы тыгыз бәйләнгән», - дип билгеләде Миңнеханов.

Фото: Чаллы шәһәре мәгълүмати сәясәт һәм җәмәгатьчелек белән элемтә идарәсе