Тинчурин театрында татар театры турында лекция узачак

«Миллиард.Татар» Кәрим Тинчурин театры белән берлектә лекция оештыра, аннан соң тамашачылар режиссер Айдар Җаббаровның «Ал яулыклы язмышым» спектакленең премьерасын карый алачак. Бу хакта лекторий телеграм-каналында хәбәр иттеләр.

Лекция кичәнең кереш өлеше булачак һәм татар театрының тарихына һәм үзенчәлекләренә багышланачак. Лектор ролендә театр режиссеры, Татарстан Республикасының халык язучысы Рабит Батулла чыгыш ясаячак.

Ул татар профессиональ театрының аякка басуы, милли сәхнә һәм репертуар чыганаклары, шулай ук Кәрим Тинчурин шәхесе һәм аның хәзерге татар театры үсешенә йогынтысы турында сөйләячәк.

Лекциядән соң чарада катнашучылар Чыңгыз Айтматов повесте буенча куелган «Ал яулыклы язмышым» спектаклен караячак.

Чара 5 февральдә Кәрим Тинчурин театрында узачак. Лекция 17:00 сәгатьтә башлана.

Рабит Батулланың лекциясе 50 минут дәвам итәчәк, аннан соң 20 минутлык сорау-җаваплар сессиясе булачак. Аннары катнашучылар тамаша залына күчәчәк, анда спектакль күрсәтеләчәк, диелә хәбәрдә.