Казан автоинспекторлары бер тәүлектә исерек хәлдәге җиде шоферны тоткарлаган

Узган тәүлектә Казанда ЮХИДИ хезмәткәрләре исерек хәлдәге җиде машина йөртүчене тоткарлаган. Шәһәр дәүләт автоинспекциясе шундый мәгълүматлар китерә.

Ведомство мәгълүматлары буенча, узган тәүлектә юл-транспорт һәлакәте турында 350 хәбәр килгән. Аварияләр нәтиҗәсендә ике кеше зыян күргән, шуларның берсе – җәяүле.

Моннан тыш, инспекторлар җинаять кылуда шикләнелгән биш гражданинны, шулай ук машина йөртү таныклыгыннан башка рульгә утырган ике шоферны тоткарлаган.

Элегрәк «Татар-информ» агентлыгы хәбәр иткәнчә, Казанда яшәүче ир-ат исерек хәлдә кабат рульгә утырган өчен бер елга колониягә хөкем ителгән. Элегрәк ул машина йөртү хокукыннан мәхрүм ителгән һәм 30 мең сум күләмендә штрафка тартылган булган инде. Аны тагын юл-патруль хезмәте хезмәткәрләре туктаткан, алар машина йөртүче исерек булырга мөмкин дип шикләнгән. Ир-ат медицина тикшерүе узудан баш тарткан, нәтиҗәдә аны машина йөртү хокукыннан кабат мәхрүм иткәннәр һәм инде җитдирәк җәза биргәннәр.