Әсгать Сәфәров: «Динамо» - ул ил тарихы, көч, ныклы ихтыяр һәм характер тарихы

Татарстан Республикасы Рәисе Администрациясе җитәкчесе, ТР «Динамо» физкультура-спорт җәмгыяте рәисе Әсгать Сәфәров ТР «Динамо» физкультура-спорт җәмгыятенең 100 еллыгына багышланган чараның тантаналы өлешендә ТР Президенты Рөстәм Миңнехановка мөрәҗәгать итте.

«Татарстан Республикасы «Динамо» физкультура-спорт җәмгыяте» иҗтимагый-дәүләт оешмасы исеменнән хәрәкәтебез эшчәнлегенә югары бәя биргәнегез өчен рәхмәт белдерергә рөхсәт итегез. Сезгә, Рөстәм Нургалиевич, шулай ук Минтимер Шәрип улына (Шәймиевкә – «Татар-информ» иск.), шушы еллар дәвамында безнең динамочылар хәрәкәтенә ярдәм иткәнегез өчен ихлас күңелдән рәхмәт әйтәм. Бүгенге көндә Россия Федерациясенең волейбол һәм чирәмдәге хоккей буенча иң яхшы спорт командаларының берсе булган командаларыбызга ярдәм иткәнегез өчен аерым рәхмәт, Рөстәм Нургалиевич. Мин безнең белән булган, безгә ярдәм иткән, бүген бирегә килергә һәм бу искиткеч бәйрәмне безнең белән бүлешергә мөмкинлек тапкан һәркемгә рәхмәтлемен», – дип тәмамлады үзенең мөрәҗәгатен Әсгать Сәфәров.

Шуннан соң Әсгать Әхмәт улы Татарстанның «Динамо» җәмгыяте ветераннарына мөрәҗәгать итте. Ул билгеләп үткәнчә, «Динамо» һәрвакыт илнең таянычы булды һәм күпсанлы патриотлар тәрбияләде.

«Кадерле коллегалары, хөрмәтле спорт ветераннары! Сезне чын күңелдән истәлекле дата - 100 еллык юбилеегыз белән котлыйм. «Динамо» җәмгыяте тарихы — ил тарихы, көч, ныклы ихтыяр, характер, үз иленең патриотлары тарихы. Бу - илебезне эчке һәм тышкы куркынычлардан саклаучы, төрле ярышларда Россия һәм кече Ватан намусын яклаучы кешеләр тарихы.

Татарстанның «Динамо» вәкилләре, һичшиксез, Россиянең динамочылар хәрәкәте үсешенә зур өлеш кертә. Күпьеллык һәм данлыклы тарихында «Динамо» хаклы рәвештә дөнья спорты елъязмасына җиңү сәхифәләрен язды», – дип искәртте Әсгать Сәфәров.