Татарстанлыларга көчле салкыннарда үтәлергә тиешле иминлек чаралары турында искәрттеләр

Бүген төнлә һәм 16 гыйнварда иртән Татарстанга көчле салкыннар килә. Һава температурасы -27 градуска кадәр төшәргә мөмкин, дип фаразлана. Россия Гадәттән тыш хәлләр министрлыгының ТР буенча баш идарәсендә көчле салкыннарда янгыннар һәм аварияләр куркынычы арта, дип кисәттеләр.

Республика халкына төп иминлек кагыйдәләрен искәрттеләр:

• ватык мичләр белән файдаланмаска;
• кулдан ясалган җылыткычларны кабызмаска;
• эшләп торган мичләрне һәм электр җылыткычларың караусыз калдырмаска һәм балаларга карарга кушып калдырмаска.

Татарстанлыларга җылыту җиһазлары белән сак эш итәргә һәм көчле суыклар вакытында урамда озак йөрмәскә киңәш ителә.