Имам спортның кайсы төрләре сөннәт булып саналуын аңлатты

Мөхәммәд пәйгамбәр с.г.в. шәхсән үзе спорт белән шөгыльләнгән һәм башкаларны да моңа өндәгән. Бу хакта «Татар-информ» га биргән интервьюсында Казанның «Гаилә» мәчете имамы Рөстәм Хәйруллин сөйләде.

«Безнең яраткан Пәйгамбәребез с.г.в. һәрвакыт сәламәт яшәү рәвешен алга сөргән. Ул үзе дә спорт белән шөгыльләнгән», - диде Хәйруллин.

Имам Мөхәммәд пәйгамбәрнең дә көрәш белән шөгыльләнергә яратуын өстәде.

«Безнең пәйгамбәр көрәшне яраткан, һәм нәкъ менә көрәш сөннәт саналган. Әгәр без мөселман республикаларына, Чечняга яки Дагыстанга карасак, – алар анда барысы да көрәшчеләр, чөнки моның белән пәйгамбәр шөгыльләнгән, һәм пәйгамбәр моны яраткан», - дип билгеләде ул.