Россиядә тюбинг таучыклары һәм «ватрушкалар» өчен ГОСТ расланды

Россиядә тюбинг таучыклары һәм аларда кулланыла торган «ватрушкалар» параметрларын көйләүче яңа илкүләм стандарт (ГОСТ) кабул ителде. Документның нечкәлекләре турында Дәүләт Думасының Гаиләне яклау комитеты рәисенең беренче урынбасары Татьяна Буцкая сөйләде, дип хәбәр итә ТАСС.

Яңа стандартта рәсми рәвештә «тюбинг таучыгы» төшенчәсе кертелә һәм аны җиһазлау буенча кырыс таләпләр билгеләнә. Трасса саклагыч бортлар белән җиһазландырылырга һәм аңлаешлы чыгу зонасына ия булырга тиеш. Шуу таучыгы автомобиль юлы, сулык, бетон киртәләр яки агачлы урман массивына барып чыгарга тиеш түгел. Моннан тыш, документта таучык параметрларына туры килгән билгеле бер төр тюбинг куллану таләбе дә каралган.

Стандартны гамәлгә кертү Яңа ел бәйрәмнәреннән соң башланачак. Буцкая сүзләренчә, яңа нормаларны аңлату өчен инвентарь җитештерүчеләр һәм дистрибьюторлар белән очрашу планлаштырыла. Төп бурыч — таучыклар янындагы прокат пунктларын ГОСТ таләпләренә туры килә торган «дөрес» тюбинглар белән тәэмин итү, бу исә куркыныч инвентарьны кулланыштан чыгару мөмкинлеге бирәчәк.

Кырыс таләпләр ихтияҗын депутат имгәнүләр статистикасы белән аңлата. Хәзерге вакытта тюбингларда шуу контрольдә тотылмый, шуның аркасында бик еш кына кышкы ял хастаханәгә эләгү белән тәмамлана.