Вольфсон Татарстанда күп балалы гаиләләр өчен Яңа ел акциясе башлануы турында хәбәр итте

Дәүләт Думасы депутаты Илья Вольфсон Татарстанда күп балалы гаиләләргә ярдәм итү буенча традицион Яңа ел акциясе башлануы турында хәбәр итте.

«Быел без биш һәм аннан да күбрәк бала тәрбияләүче 283 гаиләгә бүләкләр әзерләдек – барлыгы 1421 бала», – дип язган ул үзенең телеграм-каналында.

Депутат сүзләренчә, бүләкләрне республиканың Балтач, Алабуга, Кукмара, Лаеш, Мамадыш, Балык Бистәсе һәм Саба районнарыннан, шулай ук Казанның Вахитов һәм Идел буе районнарыннан гаиләләр ала башлаган инде. Бүләкләр тарату дәвам итә.

Акция кысаларында Вольфсон күп балалы Зиннәтуллиннарның гаиләсендә булды. Ләйсән белән Раиф гаиләсендә биш бала – ике ул һәм өч кыз тәрбияләнә. Олы балаларына 17 яшь, кечесенә ике яшь.

«Мондый гаиләләрнең елдан-ел арта баруы бик сөендерә», - дип билгеләп үтте депутат һәм акциядә катнашучыларга сәламәтлек, иминлек һәм бәхет теләде.