Дәүләт Думасы депутаты 100 яшьлек ветеранны юбилее белән котлады

Дәүләт Думасының Икътисади сәясәт комитеты рәисе Максим Топилин Бөек Ватан сугышы ветераны Михаил Корнишинны 100 яшьлек юбилее белән котлады. Бу хакта депутатның матбугат хезмәте хәбәр итә.

«Михаил Степанович авыр юл үтә: дошман белән көрәштә үлем чигендә була, ләкин түзә һәм ахырга кадәр сугыша!» - дип билгеләп үткән Топилин.

Ул медицина бригадасы ветеранның йортына килеп сәламәтлеген тикшерсен өчен Татарстан Сәламәтлек саклау министрлыгына мөрәҗәгать итәргә ниятләвен әйтте. Гаилә белән элемтә Михаил Степановичның кызы Татьяна аша саклана, ул әтисен карый.

Михаил Корнишин хезмәт юлын 16 яшендә земснарядта матрос булып башлый, 17 яшендә Иделдә ныгыту эшләрендә катнаша. 1943 елда Мәскәү янындагы өйрәнү батальонына җибәрелә, ә шул ук елның ноябрендә фронтка китә. Ул чаңгы батальонында хезмәт итә, Львов-Сандомир операциясендә һәм Висла сугышында катнаша, Җиңү көнен Прагада каршылый. Алга таба Кытайны азат итеп, Маньчжуриядә японнарга каршы сугыша.

Ветеранның ике баласы һәм алты оныгы бар. Ул II дәрәҗә Ватан сугышы ордены, «Батырлык өчен», «Сугышчан казанышлар өчен», «Праганы азат иткән өчен», «1941-1945 еллардагы Бөек Ватан сугышында Германияне җиңгән өчен» һәм «Японияне җиңгән өчен» медальләре белән бүләкләнә.