Татарстанда 2026 елда хезмәт мигрантлары өчен патент бәясе артачак

2026 елның 1 гыйнварыннан Татарстанда ялланып эшләүче чит ил гражданнары өчен патент бәясе артачак. Бу хакта ТР Дәүләт Советы матбугат хезмәте хәбәр итә.

«2026 елга Татарстан Республикасындагы хезмәт базарының төбәк үзенчәлекләрен чагылдыра торган коэффициент билгеләү турында»гы 61нче номерлы закон нигезендә түләү суммасы 7937 сум 64 тиен тәшкил итәчәк, бу узып баручы елдагы сумма белән чагыштырганда 8,5 процентка күбрәк.

Документ патент нигезендә физик һәм юридик затларга эшләүче чит ил хезмәткәрләре өчен физик затлар кеременә салым буенча теркәлгән аванс түләүләренә карата 2,55 күләмендә төбәк коэффициенты билгели.

Коэффициент төбәктә эшләүче мигрантларның уртача хезмәт хакы фаразына нигезләнеп исәпләнгән. Ул 2026 елда 58 мең сум 77 тиен дәрәҗәсендә көтелә.

Коэффициентны арттыру чит ил хезмәткәрләреннән тотрыклы салым керемнәрен тәэмин итәргә, рәсми булмаган мәшгульлек дәрәҗәсен киметергә һәм республика предприятиеләренә мигрантларны легаль рәвештә эшкә урнаштыру өчен үтә күренмәле шартлар булдырырга мөмкинлек бирәчәк, дип билгеләп үтелә.