Татарстанлыларга ана капиталын нинди белем алу максатларына сарыф итә алуларын аңлаттылар

Ана капиталы гаиләләргә булышуның бер чарасы булып хезмәт итә, аны татарстанлылар балаларның белем алуына юнәлтә ала. Аны нинди белем алу максатларына юнәлтергә мөмкин? Бу хакта тулырак - «Татар-информ» агентлыгы материалында.

Ана капиталын гаиләдәге теләсә кайсы балага 25 яшь тулганчы аның укуына түләүгә тотарга мөмкин. Әмма бала тугач яки уллыкка алынгач әлеге акчаны мәктәпкәчә белем алуга түләгәндә генә файдаланырга рөхсәт ителә. Аны белем алуның башка төрләренә ана капиталына хокук барлыкка килгәннән соң өч ел узгач кулланырга мөмкин.

Ана капиталы акчасын тулысынча бер белем алу максатына юнәлдерергә яисә берничә юнәлеш арасында бүләргә рөхсәт ителә. Әгәр акча җитмәсә, чыгымнарның бер өлешен - үзеңнең яки заем акчаларыннан, ә бер өлешен ана капиталыннан капларга мөмкин.

Ана капиталын кая юнәлдерергә мөмкин

- мәктәпкәчә белем алуга (балалар бакчасы, шул исәптән шәхси)

Акчаны бала карау хезмәтләре өчен түләүгә, шулай ук белем бирү программаларына юнәлдерергә мөмкин.

- мәктәп белеме

Биредә акча озынайтылган көнгә түләүгә һәм төп программалар буенча белем алуга тотылырга мөмкин.

- урта махсус һәм югары белем

Акчаны урта махсус яисә югары уку йортында белем алу һәм тулай торакта яшәү өчен юнәлдерергә мөмкин.

- өстәмә белем: татарстанлылар ана капиталын баланың сәләтен үстерүгә дә юнәлтә — төрле секцияләр яки түгәрәкләр өчен түли ала. Акчаны, мәсәлән, мәктәпкәчә үсеш үзәгендә, чит телләр укытыла торган мәктәптә, музыка мәктәбендә яки репетиторларга түләү өчен кулланырга рөхсәт ителә.

Төп шарт - белем бирү хезмәтләре күрсәтүче оешма яки шәхси эшмәкәр РФ территориясендә эшләргә һәм белем бирү эшчәнлеген алып бару өчен гамәлдәге лицензиясе булырга тиеш.