Рөстәм Миңнеханов 17 октябрьдә Татарстан Дәүләт Советына юллама белән мөрәҗәгать итәчәк
Татарстан Рәисе Рөстәм Миңнеханов 17 октябрьдә җиденче чакырылыш парламентның 14нче утырышында республика Дәүләт Советына еллык юллама белән мөрәҗәгать итәчәк. Бу хакта бүген ТР Дәүләт Советы президиумы утырышында билгеле булды.
«Республика парламенты үз утырышларында Татарстан Рәисенең республиканың эчке һәм тышкы хәле турында Дәүләт Советына еллык юлламасын тыңлый», – диде ТР Дәүләт Советы секретаре Лилия Маврина.
Чара Салих Сәйдәшев исемендәге Дәүләт зур концерт залында уза һәм иртәнге 10да башлана. Радио һәм телевидениедә Миңнехановның чыгышын турыдан-туры трансляцияләнә.
«Утырышка юллама нигезләмәләрен үтәүчеләрнең барысы да чакырыла», - дип искәртте Маврина.
Аерым алганда, Татарстан хакимиятенең барлык тармаклары җитәкчеләре һәм федераль хакимият органнары вәкилләре, шулай ук сәнәгать предприятиеләре җитәкчеләре, сәламәтлек саклау, мәгариф һәм фән вәкилләре, иҗат интеллигенциясе, кече һәм урта бизнес предприятиеләре, сәяси партияләр, иҗтимагый берләшмәләр, дини конфессияләр, республиканың барлык муниципалитетлары вәкилләре (барлыгы 670 кеше) чакырыла.
«Татарстан Рәисенең республиканың эчке һәм тышкы хәле турындагы җентекле докладына һәм кабат формалашкан ТР Хөкүмәте белән берлектә юлламада билгеләнәчәк юнәлешләр буенча килешенгән эшкә әзерләнәбез», – дип искәртте ТР Дәүләт Советы Рәисе Фәрит Мөхәммәтшин.