Казан шагыйрәсе Александра Кашина вафат булган

Өч китап авторы, ТР Язучылар берлеге әгъзасы, ТР атказанган сәнгать эшлеклесе, Гавриил Державин исемендәге Бөтенроссия әдәби премиясе лауреаты, «Филантроп» халыкара премиясе (Мәскәү – Женева) җиңүчесе, Казан шагыйрәсе Александра Кашина вафат булган. 8 октябрьдә аңа 39 яшь тулган булыр иде. Бу хакта ТР Мәдәният министрлыгы матбугат хезмәте хәбәр итә.

Александра Кашина сәламәтлеге белән проблемалар булу сәбәпле, инвалид креслосында йөрергә мәҗбүр иде. Шуңа да карамастан, шигъри форумнарда катнаша, шулай ук спорт журналисты булып эшли. Әле балигъ булганчы ук ул «Филантроп» халыкара премиясенә лаек була, ә 2005 елда «Ел хатын-кызы» республика конкурсының «Мәдәният-рухият» номинациясендә лауреат була.

2011 елда шагыйрә «Глядя на Вас» шигырьләр җыентыгы өчен Державин премиясенә лаек була. Бу китап та спектакльгә әверелә: Казан театр училищесында куелган спектакльнең режиссерлары Юнона Карева һәм Вадим Кешнер була.

2016 елда Кашинага Татарстан Мәдәният министрлыгыннан «Әдәбиятка керткән өлеше өчен Мактау грамотасы» тапшырдылар. 2021 елда ул әдәбиятка, иҗади һәм агарту эшчәнлегенә керткән зур өлеше өчен «Татарстанның атказанган сәнгать эшлеклесе» дигән мактаулы исемгә лаек булды.

Шагыйрә иҗатын чит ил бәяләүчеләре арасында Scorpions төркеме лидеры Клаус Майне да бар иде. Аның беренче китабы Америка әдәбиятчысы Стюарт Голдберг тарафыннан инглиз теленә тәрҗемә ителгән шигырьләрне дә үз эченә ала.