Юрист россиялеләргә пычрак номерлы автомобильдә йөргән өчен җаваплылык турында сөйләде
Транспорт чарасының номерларын укыла торган халәттә тоту таләпләрен бозган өчен җаваплылык яный. Бу хакта АИД профессиональ юридик төркеме генераль директоры Давид Адамс искәртте, дип хәбәр итә RT.
«Административ хокук бозулар кодексының 12.2 маддәсенең 1 өлеше нигезендә, номерның бер хәрефе яки саны булса да 20 метр ераклыктан танымаслык хәлгә килгән очракта машина йөртүче 500 сум штраф рәвешендә җаваплылыкка тартылырга мөмкин», – дип билгеләде юрист. Ул номерлар һава торышы начар булу яки юллар пычрак булу сәбәпле пычранган очраклар турында сүз бара, дип ачыклык кертте.
Номерларны махсус яшерү билгеләрен ачыклаган очракта исә хокук бозу Административ хокук бозулар кодексының 12.2 маддәсенең 2 өлеше буенча квалификацияләнә. Машинаның кузовы чиста, ә номерлары пычрак белән буялган яки номерның саннары һәм хәрефләре урнашкан урыннары гына пычрак булган очракта машина йөртүчегә 5 мең сум күләмендә штраф яки бер айдан өч айга кадәр транспорт чарасы белән идарә итү хокукыннан мәхрүм итү яный.
Шул ук вакытта чагыштырмача күптән түгел, 2024 елның 14 октябрендә, кабат хокук бозу өчен җаваплылыкны кырысландыручы төзәтмәләр үз көченә керде. «Әгәр машина йөртүче ел дәвамында кабат номерларын аңлы рәвештә яшерүдә тотыла икән, аңа 12 айдан 18 айга кадәр машина йөртү хокукыннан мәхрүм итү яный», - дип ассызыклады эксперт.
Әлеге норма административ җаваплылыктан аңлы рәвештә качучыларга каршы көрәшүгә юнәлтелгән. Намуссыз машина йөртүчеләр камералар хокук бозуларны теркәмәсен өчен яки юл-транспорт һәлакәтендә катнашуын яшерү өчен номерларын каплый, дип ачыклык кертте ул.
Шул ук вакытта номерлар объектив сәбәпләр аркасында пычранган булса, штрафны ун көн дәвамында кире кагарга мөмкин, дип аңлатты белгеч. Юл нинди халәттә булуын һәм һава торышы шартларын фото яки видеога төшерергә, ә аннары ЮХИДИга шикаять юлларга кирәк.
«Автоматик теркәү камералары укылмый торган номерлар өчен штраф билгеләмәвен исәпкә алу мөһим. <...> бу өлкәдә хокук нормаларын куллануны юл-патруль хезмәте инспекторлары гамәлгә ашыра», - дип өстәде Адамс.