Роскачество хезмәт базарында иң зур ихтыяҗ булган һөнәрләрне атады

Хезмәт базарында клиентократия белән бәйле белгечлекләргә ихтыяҗ арта бара. Абитуриентларга һөнәр сайлаганда бу юнәлешкә игътибар итәргә кирәк, дип саныйлар Россия сыйфат системасында (Роскачество). Бу хакта «Российская газета» хәбәр итә.

Оешма белгечләре Beyond Taylor компаниясе белән берлектә хезмәт базарын анализлаган һәм абитуриентларга һөнәр һәм уку йортын сайлауда берничә киңәш бирде.

Билгеләп үтелгәнчә, цифрлы технологияләр өлкәсе белгечләренә, шул исәптән мәгълүматлар аналитикларына, UX/UI-дизайнерларга, кибериминлек белгечләренә ихтыяҗ элеккечә зур. Хезмәт базарында шулай ук медиклар, инженерлар, финанс өлкәсе белгечләре кирәк. Әлеге һөнәр вәкилләрен ясалма фәһем һәм цифрлы технологияләр белән алыштыру кыен.

Клиентократиягә килгәндә, әлеге оешма белән идарә итү структурасында хезмәткәрләр беренче чиратта тышкы клиент яки эчке заказчы белән эшли. «Арта барган конкуренция шартларында клиентка юнәлтелгән компанияләр күбрәк өстенлекләргә ия булачак, бу мондый белгечлекләрне аеруча ихтыяҗлы итә», - дип аңлаталар оешманың матбугат хезмәтендә.

Белгечләр уку йорты сайлаганда белемнәрне практикада куллануга юнәлтелгән программалары булган, реаль эш тәҗрибәсе алу өчен стажировкалар һәм практикалар каралган университетлар һәм көллиятләр эзләргә киңәш итә.