Сенатор 2025 елда пенсиягә исәп тота алучы категорияләрне атады

Агымдагы елда Россиядә льготалы категория вәкилләренә һәм хезмәт эшчәнлеген тәмамлауны кичектерүчеләргә генә пенсия билгеләргә мөмкиннәр. Бу хакта сенатор Ольга Епифанова искәртте, дип хәбәр итә РИА Новости.

«Быел берәү дә гомуми нигезләрдә картлык буенча пенсиягә чыкмаячак, дип көтелә. 2025 елда хатын-кызлар өчен пенсия яше 59 яшь, ә ир-атлар өчен 64 яшь дип билгеләнгән. Алар 2026 елда гына пенсиягә чыга алачак. Әмма бу ирекле рәвештә пенсиягә чыгу вакытын кичектергән кешеләргә кагылмаячак», - дип аңлатты Федерация Советы әгъзасы.

Быел пенсиягә чыгу мөмкинлеге булган льготалы категорияләр вәкилләре арасында Епифанова 1962 елда туган ир-атларны (42 елдан да ким булмаган стажлы) һәм 1967 елда туган хатын-кызларны (37 елдан да ким булмаган стажлы), Ерак Төньякта яшәүчеләрне, Төньякның аз санлы җирле халыклары вәкилләрен, иҗади һөнәр вәкилләрен, авыр хезмәт шартларында эшләгән хезмәткәрләрне (яшь таләпләре үтәлгән һәм махсус һәм иминият стажы булган очракта) телгә алды.

Сенатор әйтүенчә, 15 елдан да ким булмаган иминият стажы һәм 30 пенсия баллы, шулай ук сигез яшьтән өлкәнрәк балалары булган күп балалы аналар да пенсиягә чыга алачак.

Бу барлык кирәкле шартларны үтәгән очракта 2025 елда пенсиягә чыга алучы категорияләрнең тулы исемлеге түгел, дип ачыклык кертте Ольга Епифанова. Ул барлык детальләрне ачыклау өчен Социаль фондка мөрәҗәгать итәргә киңәш итте.