Россиялеләргә коммуналь хезмәтләр өчен түләгәндә акчаны экономияләү ысулларын атадылар

Су тотуны киметеп, торак-коммуналь хезмәтләр өчен түләгәндә акчаны экономияләргә мөмкин. Моның өчен бер рычаглы кран кулланырга була, дип киңәш итә җәмәгать эшлеклесе, торак-коммуналь хуҗалык өлкәсе эксперты Дмитрий Бондарь. Аңың сүзләрен NEWS.ru китерә.

Шулай ук теш чистартканда, кулларны сабынлаганда, душта юынганда яки савыт-саба юганда кранны ябып торсаң, су азрак сарыф ителәчәк. Эксперт исәпләвенчә, мондый гамәлләр көненә дистәләгән литр суны экономияләячәк.

Суны азрак тоту өчен тагын бер ысул – ванна урынына душ керү. Бу юыну процедурасы вакытында 105 литрдан 125 литрга кадәр суны экономияләргә ярдәм итәчәк, дип саный Бондарь.

Шулай ук торак-коммуналь хезмәтләр өчен түләгәндә акча экономияләү өчен савыт-саба юу машинасы сатып алырга мөмкин. Эксперт әйтүенчә, мондый машина кул белән юуга караганда 43 яки хәтта 90 литрга азрак су сарыф итә. Иң мөһиме – аны тулысынча тутыргач кына кабызырга. Кер юу машинасы белән дә шулай эш итәргә кирәк, дип киңәш итте эксперт.

Суны экономияләүнең бишенче ысулы – су чыгымын исәпли торган җайланма урнаштыру. Мондый җайланмалар сарыф ителгән су күләмен генә түгел, су агып чыгуны да вакытында күрергә ярдәм итәчәк, дип йомгаклады Бондарь.