Казан кызлар гимназиясендә Туган тел көнен билгеләп үттеләр

Туган тел көне уңаеннан Фатиха Аитова исемендәге 12нче гимназиядә ел саен үткәрелә торган «Халыклар дуслыгы» фестивале узды. Кызлар гимназиядә халыкара бәйрәмне ничек билгеләп үтүләре турында «Татар-информ» репортажында тәкъдим ителә.

Казанның 12нче гимназиясендә төрле милләт балалары белем ала. Күбесе, әлбәттә, татарлар, әмма азәрбайҗаннар һәм беларусьлар бар, Чечня һәм Кыргызстан диаспоралары вәкилләре укый. Мәктәп директоры Зөммәрат Нәгыймова сүзләренчә, кешеләр еш кына Мәскәүдән һәм башка төбәкләрдән Казанга балаларын шушы уку йортына бирү өчен генә күчеп килә. Шул ук вакытта укыту нигездә татар телендә алып барыла, бары тик югары сыйныфларда гына математика һәм физика кебек фәннәр рус телендә укытыла.

«Безнең мәктәптә төрле милләт балалары укый һәм безнең фестивальнең төп максаты - һәр халыкның нәрсә белән яшәвен күрсәтү. Без барыбыз да бертөрле, әмма традицияләребез төрле», - дип сөйләде «Татар-информ»га директорның тәрбия эшләре буенча урынбасары Ләйлә Гайфуллина.

Фестиваль 2017 елдан бирле үткәрелә. Анда һәр укучы катнаша (чыгарылыш сыйныфларыннан һәм беренче сыйныф укучыларыннан тыш). Быел 15 класс-команда булды.

«Әгәр сыйныфта 20 бала булса, 20 бала да бу фестивальгә җәлеп ителәчәк: сәхнәдә чыгыш ясыйлар яки әзерлиләр», — дип өстәде Гайфуллина.

Фестивальгә әзерлек барышында сыйныф җитәкчеләре арасында җирәбә салу үткәрелә – һәр команда үз милләтен – татарларны, русларны, кыргызларны, мариларны, казахларны, кубалыларны, кытайларны һәм башкаларны ала. Быел катнашучы халыклар өчен БРИКСның XVI саммиты төп юнәлеш булды.

«Жирәбә укытучылар арасында үткәрелә, һәм алар үзләре дә аларга нинди халык туры киләчәген белми. Балалар үзләре дә укытучының теманы әйтүен түземсезлек белән көтәләр. Балаларның фестиваль белән кызыксынуы мине, укытучы буларак, бик тәэсирләндерә», - дип уртаклашты директор урынбасары.

Фестивальнең үз программасын шартлы рәвештә ике блокка бүлеп була: бәйрәм өстәле һәм номер-презентация. Беренче өлештә балалар бәйрәм өстәлләрен тәкъдим итә – алар төрле ризыклардан сыгылып тора диярлек. Алга таба - музыкаль-бию номерлары. Катнашучыларга 5-7 минут эчендә үз халкының мәдәниятен һәм гореф-гадәтләрен күрсәтергә кирәк, кайбер командалар хәтта яңа тел өйрәнергә дә өлгерә.

«Халыклар дуслыгы» фестивале — гимназиянең эчке чарасы. Жюри – ул укытучылар һәм завучлар. Җиңүчеләр дипломнар һәм грамоталар ала, ә чыгышлардан һәм җиңүчеләрне игълан иткәннән соң, барлык катнашучылар чәй табыны янына җыела. Иң күңелле өлеше – конкурста катнашкан ризыклардан авыз итү.

Гимназия 1993 елда Вахитов районында ачыла. 2011 елда мәгариф учреждениесе Мәскәү районында яңа бинага күчте.

«Безнең гимназияне «ике канат астындагы гимназия» дип атыйлар. Беренче канат – Туфан Миңнуллин, икенчесе-Фатиха Аитова», - дип сөйләде «Татар-информ»га директор Нәгыймова.

Шул ук 2011 елда гимназиягә татар меценаты Фатиха Аитова исеме бирелә, Ул 1897 елда Казанда кызлар өчен беренче гимназияне ача. Укучыларга дини фәннәр генә түгел, дөньяви фәннәр дә, шулай ук кул эшләре дә укытканнар. Гимназиядә Аитова музее һәм остаханә эшли.

12нче гимназия өчен Туфан Миңнуллинның шәхесе зур әһәмияткә ия. Яңа бинага күчкәч, язучы беренче укучыларын кабул итә. Хәзер монда шулай ук драматургка багышланган музей урнашкан. Узган елның март аенда биредә Туфан Миңнуллин исемендәге фәнни-гамәли конференция үткәрелә.

Гимназия шулай ук иң актив тәрбияләнүчеләргә ай саен 1 мең сум премия бирә, ә иң яхшы чыгарылыш укучыларына «Соңгы кыңгырау» бәйрәмендә Туфан Миңнуллин көмеш беләзеге тапшырыла.

«Безнең гимназиядә кызлар гына укый. Кызны укыту һәм тәрбияләү — җәмгыятьнең үзен тәрбияләү һәм укыту белән бер ул диләр» - диде Нәгыймова.

Гимназиядә Мода театры эшли, Этикет һәм хәтта дефиле дәресләре үткәрелә. Башлангыч мәктәптә укучылар ике еллык мәҗбүри дәресләрне подиум залында уза. «Хәят» театр студиясе дә монда урнашкан.

«Хатын-кызлар белеме - ул ашарга әзерли белү генә түгел. Безнең кызлар үзләре үк хезмәт сөючән. Узган ел бездә республика олимпиадасында 37 призер булган иде. 400дән артык кеше укый торган гимназия өчен бу зур казаныш», — дип саный директор.